БІРЛІК – ЕЛ ТҰРАҚТЫЛЫҒЫНЫҢ АЛТЫН ҚАҒИДАСЫ

БІРЛІК – ЕЛ ТҰРАҚТЫЛЫҒЫНЫҢ АЛТЫН ҚАҒИДАСЫ

Қоғамның дамуы мен мемлекеттің өркендеуі ең алдымен халық арасындағы татулық пен өзара сенімге негізделеді. Бірлігі бекем ел ғана уақыттың кез келген сынынан сүрінбей өтіп, болашаққа нық қадам жасай алады. Сондықтан бірлік – ел тағдырымен тығыз байланысты, қастерлі ұғым.

Бүгінде әлемнің әр түкпірінде этносаралық және діни қайшылықтардан туындаған тұрақсыздық көріністері аз емес. Осындай күрделі кезеңде Қазақстанның бейбітшілік пен келісімді басты құндылық ретінде ұстануы – парасатты әрі сындарлы саясаттың айқын көрінісі. Бұл ұстаным халқымыздың тарихи жадысы мен өмірлік тәжірибесінен бастау алады.

Қазақ халқы қашанда кеңпейілділігімен, адамгершілігімен ерекшеленген. Тағдыр тәлкегіне түскен өзге ұлт өкілдерін бауырына басып, бір шаңырақ астында татулықта өмір сүруге мүмкіндік берді. Осы ізгі қасиеттер бүгінгі қоғамдық келісімнің берік негізіне айналды.

Қазіргі таңда Қазақстанда 130-дан астам этнос өкілі бір мақсат, бір мүдде жолында еңбек етуде. Бұл – бірлік пен достықтың ел дамуына серпін беретін қуатты күш екенін дәлелдейді.

Қазақстан халқы Ассамблеясы – татулық пен келісімді нығайтудың тиімді тетігі. Бұл институт этностар арасындағы өзара түсіністікті арттырып, ортақ азаматтық құндылықтарды дәріптеуде маңызды рөл атқарып келеді.

Бірлік – тек бүгінгі тұрақтылықтың кепілі ғана емес, болашақтың берік іргетасы. Ынтымағы жарасқан елдің еңсесі биік, келешегі кемел болмақ.